العمري: كل المبادرات إنسانية.. والمجرب لا يُجرّب.. نريد وجوهاً جديدة وبرنامجاً جديداً

متابعات: اللحظة نيوز

قال رئيس منظمة أبونا آدم والقيادي، الدكتور أسامة الفاتح العمري، إنه يشكر كل الدول والمنظمات على المبادرات التي تطرحها، معتبراً أن كل هذه المبادرات في إطار المبادرات الإنسانية، وليست مبادرات سياسية ولا اقتصادية.

وأضاف أن الهدف منها أن يصل السودانيون لتوافق مع بعضهم البعض ويحصل استقرار في السودان، وأن نجاحها يعتمد على الإرادة والقيادة الرشيدة والشفافية والوعي عند الشعب.

واوضح لابد أن يكون في شيء بيمثلك، أنت عايز شنو للسودان، من خلاله أكيد حيكون عندك توافق مع جزء من المبادرات دي، أو يكون عندك مبادرة.

وأكد أن مسألة السياسة والاستراتيجية لا توجد حالياً، فهذه المبادرات ليس لها أي علاقة باستراتيجية أو باقتصاد أو بمصالح، بل هي من واقع إنساني بحت، ونحن المفروض نكون حريصين على الإنسانية بالنسبة لنا ولغيرنا أكثر من المبادرين ذاتهم، ولابد أن نطرح حلاً.

وقال بالتالي الإرادة زائد الشفافية والوضوح مننا ومنهم والازمي المبادرات تكون معلنة وواضحة “ما في حاجة بالدس طوالي المبادرة دي لكده كده”

وأضاف أن أي زول بيفتش مصلحة بلده، العالم كله بيقف معاه، ولا في زول بيعاديه في مصلحة بلده، لكن إذا لم يفهموا أنك أنت عارف مصلحة بلدك، فبالتالي ما حتفهم مصالحك معاه ذاتها.

وحول المبادرات السياسية فيما يخص القوى السياسية والطموح في العودة للسلطة، قال إنه يفتكر أن هذا ليس وقته، وأن وقت القوى السياسية وكل من يتكلم عن السياسة هو وقت الانتخابات في ظروف تختلف عن الظروف التي نعيشها الآن.

وأوضح أن الظروف الحالية هي ظروف قوة جاية تنقذ الشعب من مآسي الصراعات السياسية، يعني يجوا ناس ما لهم أي علاقة بالسياسة ولا بأي قوة سياسية، لأننا تعبنا من تدوير المشهد وتدوير نفس الشخصيات، وسئمنا كشعب من كل الأسامي القديمة.

وتابع العمري إن شاء الله يقدروا ينجحوا فيما بعد في انتخابات إذا لقوا عندهم قبول، لكن دي مرحلة عايزة تتخلص من آثارهم السالبة اللي عملوها في الناس والوصلنا ليه.

وأضاف أن هناك من يدور أنه والله بعض القوى السياسية مدعومة خارجياً وبعضها مدعومة داخلياً، لكنه يفتكر أنه لا يوجد زول بيقدر يملي على السودان منو يجي، الشعب السوداني هو من يحدد منو يجي.

وقال أنا كواحد من الشعب السوداني، أنا ما داير أي زول من القدام، أنا داير ناس جداد وداير برنامج، داير برنامج ما يشبه البرامج القديمة دي كلها، برنامج جديد يواكب التطور والأخلاق العالمية الموجودة في الوقت الحالي.

وتساءل أما مسألة نحنا نقعد نرجع لـ 100 سنة ورا من صراعات متجددة بأسامي مختلفة متكررة لا مكان لهم في المستقبل حتى ذاته هسا إحنا ما قادرين نفهم القوة السياسية هي المجتمعية ولا هي الأحزاب ولا هي التحالفات، يعني ما عايزين نرا مفوضية العون ولا مفوضية الأحزاب دي تحدد ذاتها شنو القوة السياسية يعني هي دي شرعيتها شنو.

واكد العمري للمسميات هذه ما  هم بيقعوا في جزء من البرامج، يردون يمارسوا سياسة ليه طالعين من أحزابهم، ما يخشوا في أحزاب اللي هم فيها، ليه كل زول يطلع من حزب ويكون له تحالف ويجي يقول قوة مدنية، فهذا المسألة هذه كلها جربت والمجرب لا يجرب.

وختم العمري نحن عشنا تجارب صعبة جداً جداً، سواء السودانيين القاعدين داخل السودان ولا في الخارج ، ونتمنى أن الأجيال الجاية تجد ظروف أفضل من اليوم ، ما في داعي لتكرار الحاجات الناس   استهلكت في أثناء سنواتها في الحكم واستهلكت في أثناء معارضتها واستهلكت في استجلاء التحالفات لكي تصل للحكم،” وماافتكر عندها شيء يقدموه” وإذا عندهم شيء يقدموه يطالبوا أن تبقى فترة انتقالية قصيرة الغرض منها ا ترتيب نفسها، الأحزاب، ويتطلب هذا الشي ان يكون للشارع السوداني٠