❤ الزمن الجميل استمر لغاية ١٩٨٠ وانتهى
😉 البيت يكون فيهو ١٩ نفر وشغال وااااااحد فيهم وتدفع فاتورة كهرباء وموية وتلفون وعوائد والبيت فيه شجرة ليمون وجوافة ومنقه وفيه تعريشة فيها ٨ غنمايات بسخلاتن وفيهو بيت حمام فيه ٢٥ صفيحة كل صفيحة جوز حمام وفيهو كر جداد بلدي وبيطري وكمان في كلب وكديسة 😅
❗ويومااااتي شاي الصباح والضحي والمغرب ▪ ويوم الجمعه صينية الغداء يشيلوها اتنين وبعدها صحن تحلية كااااارب !!
🔹 وبعد ده كله كان حيطة الجيران عندها صحن مخصوص يوماتي تتبادل المطايب إن شاء الله بطيخة ولا شعيرية أو عصيدة !!
🔹 وكل شهر في ضيف من البلد بجي يقعد أسبوع اقل شئ وما بجي فاضي يا شوال دخن أو شوال بلح ومرات فول وقمح وذرة !!
🔹 ويوماااااااتي الحوش يتقشا ويترشا والاوضه الضفرة تتطنبج بالخرطوش مع المروحة تبقي تلج بس تنوووووووم علي أنغام أجنحة المروحه ولسان العرب وربوع السودان وصديق احمد حمدون إذاعة أمدرمان وليلى المغربي وبليلة مباشر ودكان ود البصير والدهباية وركن الأطفال وعمكم مختار !!
💠 حتي الملايات والمخدات فيهم ريحة حبوبة وحنية المخدة ذاته تقالدك تطبطب عليك تنوم تغرق ❗
وفي العيد جنينة الحيوانات والطوطحانية ام عنقريب وإيجار عجلات وعيدية تحسب القروش ١٠٠ مرة !
❤ تطلع للمدرسة تشوف العمال واقفين منتظرين بص مصنع النسيج وتشوف دكاترة ومهندسين وموظفين في المحطة منتظرين الطراحات ناس نضاااااف اولاد ناس وقيافه ومحترمين ومهذبين !!
❤ ويوم الخميس الفسحه سينما ويدخلوكم عائلة ومساحة فيها سور و٦ كراسي وقبل الفيلم تطلب سندوتشات سجك أو سمك ومعاها دبل كولا لمن يفتحوها صوت الفريته زي بونية البطل محمد على كلاى تسمع تشششش وتشيل منها جغمة تعمل ليك كاروشة في نخرتك لمن نفسك يتقطع ❗
😂 وترجع البيت كان بقيت ود عز تلبس البيجاما وتتمسح بالجلسرين وكان هناي تتجلبط بزيت سمسم ولا كركار يشموك في طابور المدرسة !
❌ عملتوها لينا سيراميك ولودبيرنق وستائر وملايات وخشم الباب شوال وساخة والبيت فيهو ١٥ موظف رواتبهم كلهم ما تشتري عربية فلوكسواجن قعونجة ولا عجلة رالي !!
❓ هو الحصل شنو قدر ده بقت ممحوقة ليه ؟ ..
💠 حال بلدنا يا ريتو يتعدل .. وما بينعدل إلا بالتمسك بكتاب الله والرجوع لعاداتنا وتقاليدنا السمحة.
عزيز انت ياوطني
برغم قساوة المحن
برغم صعوبة التيار ….
ناس الزمن ده حاضرين ؟؟؟
*هدية من ناس الزمن البركة لناس الزمن الممحوق*
*أسأل الله أن يبارك لكم وفيكم ويحفظ السودان وأهله ..*
